Nk’uko bitangazwa n’impuzamashyirahamwe y’Umupira w’Amaguru muri Afurika y’Uburasirazuba n’iyo Hagati (CECAFA), ivuga ko ikipe ya APR FC iri mu makipe yemeje ko azitabira CECAFA Kagame Cup izabera i Dar Es Salaam muri Tanzania.
Iri rushanwa ryitabirwa n’amakipe yabaye aya mbere iwayo mu karere ka CECAFA, riteganyijwe kuba hagati ya tariki ya 1 n’iya 15 Kanama 2021.
Tombola y’uko amakipe azaba ameze mu matsinda iteganyijwe tariki ya 27 Nyakanga 2021.
Ni irushanwa rihuza amakipe yo mu bihugu 12 bigize CECAFA, kuri iyi nshuro rizitabirwa n’amakipe 9 asanzwe yo muri CECAFA(aturutse mu bihugu 7 byo muri CECAFA) n’ikipe imwe ya Big Bullets yo muri Malawi izaza nk’umutumirwa.
Amakipe yamaze kwemeza ko azitabira iri rushanwa ni: Express & KCCA (Uganda), Young Africans & Azam FC (Tanzania), Tusker FC (Kenya), APR FC (Rwanda), Le Messager Ngozi FC (Burundi), Altabara FC (Sudani y’Epfo), KMKM SC (Zanzibar) na Big Bullets (Malawi).
Iri rushanwa riterwa inkunga na Perezida w’u Rwanda Paul Kagame aho atangamo ibihumbi 60 by’Amadorali, umwaka ushize wa 2020 ntabwo ryabaye kubera icyorezo cya COVID-19, ryaherukaga kuba muri 2019 aho ryabereye mu Rwanda, APR FC yaviriyemo muri 1/4 ikuwemo na AS Maniema yo muri DR Congo.
