Kuri iki cyumweru tariki ya 11 Nyakanga guhera ku i saa tatu z’umugoroba ruraza kuba rwambikanye hagati y’ikipe yighugu y’Ubutaliyani izwi ku izina Azzura ndetse n’ikipe y’igihugu y’Abongereza izwi ku izina rya Three Lions, ni ku mukino wa nyuma w’irushanwa rya EURO 2020 uri bubere kuri Stade ya Wembley ibarizwa mu mujyi wa London mu Bwongereza.
Nubwo amateka ya ruhago hari byinshi avuga kuri aya makipe yombi ndetse n’irushanwa ubwaryo, hari n’icyo imibare igaragaza.
Iri rushanwa u Butaliyani bwigeze kuryegukana mu 1968 ariko kandi bumaze gutsindirwa ku mukino wa nyuma inshuro ebyiri (2000 ndetse na 2012). Ni mu gihe u Bwongereza bwo ari ubwa mbere bugeze ku mukino wa nyuma w’iki gikombe.
Mu mikino 27 kandi amakipe yombi amaze gukina, u Butaliyani bwatsinzemo 11, u Bwongereza butsinda 8 hanyuma binganya imikino 8. Nubwo ariko bigaragara ko hari aho u Bwongereza bwagiye butsinda u Butaliyani, nta narimwe bwari bwabatsindira mu marushanwa akomeye (igikombe cy’isi cyangwa EURO).
Ni ku nshuro ya mbere kandi u Bwongereza bugiye gukina umukino wa nyuma wa EURO. U Butaliyani bwo bumaze gukina imikino ya nyuma 14 mu marushanwa akomeye (Imikino 10 y’igikombe cy’isi n’imikino 4 y’igikombe cy’Uburayi).
U Budage nibwo bwonyine bwakinnye imikino myinshi ya nyuma (final) kurusha u Bwongereza ku mugabane w’Uburayi.
Ubutaliyani kandi bugiye kwinjira muri uyu mukino bumaze imikino 33 budatsindwa (Bwatsinze 27, bunganya itandatu). Muri iyo mikino bwatsinzemo ibitego 86, bwnjizwa gusa ibitego 10. Nibwo bwa mbere iyi kipe yamara igihe kinini idatsinzwe.
Mu mikino 17 u Bwongereza buherutse gukinira kuri sitade ya Wembley bwatsinzemo 15, butsindwa umwe, bunganya undi. Muri iyo mikino kandi bwatsinzemo ibitego 46, butsindwamo bitanu. U Bwongereza kugeza ubu bumaze imikino 12 butari bwatsindwa (Bwatsinze imikino 11 bunganya umukino umwe).
Kuva iri rushanwa ry’amakipe y’ibihugu ku mugabane w’u Burayi ryatangira, ikipe imaze kuryitabira inshuro nyinshi ni u Budage bumaze kurikina inshuro 13, mu gihe u Butaliyani ndetse n’u Bwongereza buri kimwe kimaze kwitabira iyi mikino inshuro 10.
Amateka y’Ubutaliyani n’u Bwongereza mu mupira w’amaguru
Aya makipe yombi afitanye amateka yo guhangana agiye kumara hafi imyaka 82, dore ko umukino wa mbere aya makipe y’ibihugu yakinnye yawukiniye I Roma mu Butaliyani, hari mu mwaka wa 1933. Uyu mukino warangiye ari igitego 1 kuri kimwe.
Mu myaka 40 yakurikiyeho, u Bwongereza bwari bwarifatiye Abataliyani kuko bwatsize imikino 7 yose bwakinnye nabo. Mu mwaka wa 1973 u Butaliyani bwaje kwigaranzura u Bwongereza, maze bubutsinda ibitego bibiri ku busa, umukio wari wabereye mu Butariyani mu mujyi wa Turin.
Aya makipe yaherukaga guhurira muri iri rushanwa rya EURO mu mwaka wa 2012, icyo gihe Ubwongereza bukaba bwarakuyemo Ubutaliyana kuri penaliti 4-2.
