Igihugu cya Ghana cyabaye icyambere ku isi, gikoresheje urukingo rushya rwa Malaria rwiswe R21, rukora cyane ugereranyije n’izindi zabanje.
Abashinzwe ubugenzuzi bw’imiti muri iki gihugu bavuga ko basuzumye ubuziranenge bwarwo n’amakuru arwerekeyeho, babone kwemeza ikoreshwa ryarwo, gusa ishami ry’umuryango w’abibumbye ryita kubuzima ku isi OMS, rivuga ko ritaremeza urwo rukingo, ahubwo hari gukorwa inyigo kuri rwo n’uburyo rwakwemezwa.
Amakuru y’ibanze y’igerageza ryarwo muri Burkina Faso yerekanye ko R21 ikora ku rugero rwa 80% iyo itanzwe nka doze eshatu z’ibanze, nyuma y’umwaka ugahabwa urushimangira.
Ariko ikoreshwa ryagutse ry’uru rukingo rishingiye ku byavuye mu igerageza ryagutse ryakozwe ku bana hafi 5,000.
Ibyavuye muri iryo gerageza byagombaga gutangazwa mu mpera z’umwaka ushize, ariko ntabwo birashyirwa ku mugaragaro. Gusa, byahawe bimwe mu bigo bishinzwe ubuzima muri Africa, n’abahanga muri siyanse.
Ikigo cya Ghana gishinzwe imiti n’ibiribwa, cyabonye ibyavuye muri iryo suzuma, cyemeje ko uru rukingo rukoreshwa ku bana bari hagati y’amezi atanu n’imyaka itatu.
Ibindi bihugu bya Africa nabyo birimo kwiga ibyavuye muri iryo suzuma, cyo kimwe na OMS.
Prof Adrian Hill, ukuriye Jenner Institute muri University of Oxford, aho uru rukingo rwakorewe, yavuze ko ibihugu bya Africa birimo kuvuga ngo: “Tuzafata umwanzuro”.
Yabwiye BBC ati: “Twiteze ko R21 izagabanya bikomeye imfu z’abana zitewe na malaria mu myaka iri imbere, kandi mu gihe kirekire ruzatanga umusaruro mu ntego yo guca malaria burundu.”
Serum Institute of India irimo kwitegura gukora hagati ya doze miliyoni 100 na 200 z’uru rukingo ku mwaka, hamwe n’urukingo rw’inkingo rurimo kubakwa i Accra muri Ghana.
Buri doze ya R21 byitezwe ko izaba ifite agaciro k’amadorari ari munsi ya icumi.
Adar Poonawalla ukuriye Serum Institute ati: “Gukora urukingo rukingira iyi ndwara ikomeye byari bigoye cyane.”
Yongeyeho ko Ghana, igihugu cya mbere cyarwemeje, ari “intambwe ikomeye cyane mu muhate wacu wo kurwanya malaria ku isi”.
Amakuru agaragaza ko buri mwaka, Malaria ihitana abagera ku 620,000 biganjemo abana bakiri bato.
