Guverinoma yemeje ko Guma mu Rugo ikomeza iminsi 5 i Kigali n’Uturere 8
Umujyi wa Kigali n’Uturere 8 byugarijwe na Covid-19 irimo amoko yihinduranyije nka Delta Viariant, byongerewe iminsi 5 yo Kuguma mu Rugo, hari hashize iminsi 10 icyemezo gifashwe.
Inama y’Abaminisitiri yo ku wa 14 Nyakanga 2021 ni yo yashyizeho Guma mu Rugo muri Kigali no mu Turere twa Musanze, Burera na Gicumbi mu Ntara y’Amajyaruguru, Kamonyi mu Ntara y’Amajyepfo, Rubavu, Rutsiro mu Ntara y’Iburengerazuba na Rwamagana na Nyagatare mu Ntara y’Iburasirazuba.
Hari hashize iminsi 10 icyemezo cyubahirizwa, nubwo Guma mu Rugo nyirizina yatangiye tariki 17 Nyakanga 2021.
Uyu munsi ntibyasabye ko habaho Inama y’Abaminisitiri, itangazo ryasinyweho na Minisitiri w’Intebe, rimenyesha ingamba zo gukumira icyorezo cya Covid-19, rivuga ko Guverinoma yongeyeho iminsi 5 ya Guma mu Rugo muri Kigali no mu Turere 8 twavuzwe.
Itangazo rya Guverinoma rivuga ko iyo minsi itanu ya Guma mu Rugo izabarwa kuva tariki 27 Nyakanga 2021 kugera ku ya 31 Nyakanga 2021.
Guma mu Rugo ihagaze ite?
Moto n’amagare bibujijwe gutwara abantu, ingendo mu modoka zitwara abantu mu buryo bwa rusanze zirabujijwe.
Gusurana n’izindi ngendo zitari izijyanye na gahunda z’ubuzima birabujijwe. Ibikorwa by’abikorera birafunzwe uretse ahacururizwa ibiribwa na pharmacy, ariko naho hemewe gukora abatarenze 30%.
Leta yatangiye gufasha imiryango ibona ibiyitunga ari uko bene urugo bagiye gukora, nibura igera ku bihumbi 220 ni yo yabaruwe, itangira guhabwa ibiribwa birimo umuceri, amavuta yo guteka, n’ibishyimbo ndetse na kawunga.
Ni ibiribwa bizamara iminsi 10 y’iyi gahunda ya Guma mu Rugo yari iriho.
Minisitiri w’Ubutegetsi bw’Igihugu Hon Gatabazi Jean Marie Vianney yatangarije RBA mu mpera z’iki Cyumweru ko kugeza ubu Imirenge 28 muri 35 imaze guhabwa ibiryo mu Mujyi wa Kigali, ndetse na litiro 158, 000 z’amata zigenewe abana bari munsi y’imyaka itanu. Hakiyongeraho na toni eshatu z’ibiryo by’intungamubiri.
Yavuze ko hari indi miryango igera kuri 75 itashyizwe ku rutonde ku buryo yazashyirwaho ku rw’abazafashwa ubu.
Ahandi mu gihugu harakomeza kubahirizwa ingamba zari zisanzweho.
Soma itangazo ryose
