LIVE: (Amafoto) Chorale de Kigali yifatanyije na korali 15 zo muri Afurika mu gitaramo gisoza iserukiramuco ry’indirimbo
i Rusororo ku Intare Arena aharimo kubera igitaramo gisoza Iserukiramuco ry’Indirimbo zo kuramya no guhimbaza Imana ryitabiriwe na korali zirenga 15 zikomeye ziganjemo izo muri Kiliziya Gatolika zaturutse mu bihugu byo hirya no hino muri Afurika.
Iri serukiramuco ryabereye mu Mujyi wa Kigali hagati ya tariki 24-27 Werurwe 2022, ryakiriwe na Chorale de Kigali ku bufatanye n’Ihuriro Nyafurika rigamije guteza imbere muzika ya korali muri Afurika (African Choral and Gospel Championship, ACGC).
Iri serukiramico rya ACGC ni urubuga rwo guhuriza hamwe Abanyafurika by’umwihariko abari muri iki cyiciro cy’abahanzi baririmba indirimbo zo kuramya no guhimbaza Imana.
Kuva ryatangira ku wa 24 Werurwe 2022, abaryitabiriye bagera kuri 500 bakoze ibikorwa bitandukanye birimo amarushanwa yahuje za korali ndetse n’abaririmba ari amatsinda, babonye umwanya kandi wo gusura ibikorwa bibumbatiye amateka y’u Rwanda birimo Urwibutso rwa Jenoside rwa Kigali ruri ku Gisozi.
Uretse gusura Urwibutso rwa Jenoside yakorewe Abatutsi mu 1994 kandi abitabiriye iri serukiramuco batemberejwe ibice bitandukanye bigize Umujyi wa Kigali ndetse by’umwihariko ku wa Gatandatu basuye Pariki y’Igihugu y’Ibirunga iherereye mu Ntara y’Amajyaruguru.
Nyuma y’ibyo bikorwa bitandukanye, kuri ubu abitabiriye iri serukiramuco bose bateraniye muri Intare Arena aho bitabiriye igitaramo cyo kurisoza cyanahujwe n’umuhango wo guhemba abagiye batsinda mu marushanwa atandukanye.
KURIKIRA UKO IGITARAMO KIRI KUGENDA:
19:40: Ab’inkwakuzi bahageze kare
Igitaramo cyo gufungura iri serukiramuco cyabaye ku wa 24 Werurwe 2022, cyitabiriwe n’abayobozi barimo Minisitiri w’Uburezi, Dr Uwamariya Valentine; Umunyamabanga muri Minisiteri y’Urubyiruko n’Umuco, Bamporiki Edouard n’abandi banyacyubahiro.
Ni igitaramo kandi cyari cyitabiriwe n’abahagarariye ibihugu byabo mu Rwanda barimo Ambasaderi wa Israel mu Rwanda, Dr. Ron Adam n’abandi badiplomate by’umwihariko abahagarariye ibihugu bya Afurika byitabiriye iri serukiramuco.
Kuri iyi nshuro nabwo abayobozi ntibatanzwe mu bitabiriye iki gitaramo kuko Ambasaderi w’u Bufaransa mu Rwanda, Antoine Anfré ari mu ba mbere bageze ku Intare Arena ahagiye kubera iki gitaramo.
