Mu Rwanda hagaragaye ubwoko bushya bwa Covid-19 bwitwa Beta nyuma ya Delta

Minisiteri y’Ubuzima iratangaza ko mu Rwanda hakomeje kugaragaza ubwoko bushya bwa COVID-19 yihinduranyije kuko nyuma ya Delta hanagaraye iyabonywe bwa mbere muri Afurika y’Epfo ndetse n’ubwabonetse muri California.

Byatangajwe na Minisitiri w’Ubuzima, Dr Daniel Ngamije wavuze ko mu bipimo bigenda bifatwa hari ibisuzumwa kugira ngo harebwe ubwoko bwa virusi ya SARS-CoV-2 yihinduranyije.

Yavuze ko mu bipimo 36, hagaragayemo 67% bwa Delta, hakaba ubundi 10% bwa Virus yabonetse bwa mbere muri Afurika y’Epfo izwi nka Beta ndetse na 10% bw’iyabonetse muri California izwi nka Epsilon.

Minisitiri w’Ubuzima Dr Ngamije Daniel yagize ati “Bacyeya ni bo bari bafite ubwoko busanzwe budateye impungenge.”

Minisitiri Ngamije avuga ko ubwoko bwa Delta ari bwo bubi cyane kuko butuma uwabwanduye arembywa cyane n’ibimenyetso bidasanzwe birimo kuribwa umutwe no kunanirwa guhumeka.

Ibi bitangajwe mu gihe imibare y’abasangwamo COVID-19 ikomeje gutumbagira ndetse n’abahitanwa n’iki cyorezo bakaba bakomeje kuba benshi.

Kuri uyu wa Gatandatu tariki 10 Nyakanga 2021 ni bwo mu Rwanda hapfuye abantu benshi bazize iki cyorezo aho cyahitanye abantu 17 mu gihe abo cyahitanye muri iki cyumweru gusa ari 81.

Dr Ngamije avuga ko itumbagira ry’imibare y’abahitanwa na COVID-19 ntaho ihuriye no kuba batitaweho ahubwo ko bifitanye isano n’ubu bwoko bushya bwa kiriya cyorezo gikomeje koreka imbaga ku Isi.