Kwimakaza ibiganiro mu rugo: Ipfundo ry’umunyenga w’urukundo rwa Colette na Emmanuel rumaze imyaka 42
Kwimakaza ibiganiro mu rugo ni byo byatumye Musabyimana Colette na Bizimana Emmanuel, bamaze imyaka 42 babana nk’umugore n’umugabo, kandi mu mahoro. Bizimana ati“Twimitse ikiganiro mu rugo. Tugira umwanya wihariye wo kuganira.”
Uyu muryango utuye mu ntara y’Amajyaruguru, Akarere ka Gicumbi, Umurenge wa Rubaya, Akagari ka Mukuramo, Umudugudu wa Santere Rubaya.
Bemeza ko ibiganiro bagirana ari ryo pfundo ry’imibanire myiza mu rugo rwabo. Bizimana ati “Muri uko kuganiro ni ho tubonera uburyo bwo kwirinda no gukumira ibibazo byose byashobora kuvuka hagati yacu.”
Colette ashimangira ko “No mu bindi bikorwa bizana amafaranga turicara tukabiganiraho; tugafata ingamba n’umwanzuro twese tubigizemo uruhare.” Yongera ho ko “dufite konti twese. Buri muntu ni umwishingizi wa mugenzi we.”
Ibi biganiro byanabaye isoko y’iterambere mu rugo rwabo. Bayobotse ibigo by’imari bahabwa inguzanyo yabafashije kubaka inzu ebyiri bakodesha ibihumbi 130RWF buri kwezi. Ni iterambere ngo batashoboraga kugeraho iyo batimakaza ibiganiro mu rugo rwabo.
Bizimana ati “Abashakanye bataganira, ntibashobora kugera ku iterambere. N’iyo barigeraho, bataganira, biteza umwiryane n’amakimbirane kuko ibyo bakora, akenshi baba basahura, bamarana.”
Kuri ubu, umuryango wa Musabyimana Colette na Bizimana Emmanuel ufasha n’indi miryango kubana neza. Binyuze mu ishuri bise ‘Ishuri rirangwa n’ubudahemuka’ bafashije ingo 270 zo mu mirenge ibiri y’akarere ka Gicumbi kongera kubana neza. Babahaye inyigisho ku gukumira amakimbirane; ikiganiro hagati y’abashakanye; gucunga umutungo w’urugo; kurwanya ihohoterwa rikorerwa mu ngo no gutegura indyo yuzuye.
Izo nyigisho zatumye zimwe mu ngo zabanaga zitarasezeranye byemewe n’amategeko ziyoboka iyo gahunda.
